piket protesta at welga sa Goldilocks hanggang CE

PICKET PROTEST AT WELGA SA GOLDILOCKS
HANGGANG CERTIFICATION ELECTION

Sa mahabang panahong balot sa takot ang mga manggagawa sa Goldilocks ay sinamantala ng Buklod ang mga pagkakataong itali at busalan sa bibig ang mga pobreng empleyado. Nagising na lang tayo na may unyon na pala sa Goldilocks sa katauhan ng Buklod. Unyon na walang ginawa kundi ang magpagamit sa management at pagkamal ng pansariling interes ng mga opisyales nito habang ang mga myembro ay nakalugmok sa abang kalagayan. Sa hindi na makayanang tiisin pa ng mga manggagawa ang palalang kalagayan nito ay unti-unting pinukaw ang damdamin na labanan ang di-makataong patakaran ng Buklod. Dito nagsimulang maghanap ng alternatibong unyon tayong mga manggagawa na hindi naman nabigo dahil naitatag natin ang isang tunay na unyon, ang BISIG.

Subalit sadyang sagad-sagad ang kawalanghiyaan ng Buklod. Matapos ilampaso ng BISIG sa eleksyon ang Buklod ay samu't saring pamemerwisyo ang ginawa sa BISIG. Nandyan ang ipakansela ang independent registration natin na ang tuwirang naperwisyo ay ang buong manggagawa ng Goldilocks. Hindi natinag ang BISIG at patuloy na lumaban at muli itong nagkaroon ng bagong legal personality bilang BISIG-AGLO.

Kung dati hindi lumalantad ang management sa pagwasak sa ating unyon, dito'y tuluyan nang nalantad ang mukha ng management na siyang operator ng lahat ng ito. Nang magsara ang SM Cubao branch ay sinamantala ito ng management. Itinapon sa provincial store ang mga aktibo nating tagasuporta kasama syempre ang pangulo ng BISIG na si Joel Lachica.

Kitang-kita ang intensyong wasakin ang ating unyon. Batid din nating lahat na maraming bakante dito sa Metro Manila na pwedeng paglipatan ng mga apektadong manggagawa. Dagdag pa ay ang pagbubukas ng bagong branch sa Ali Mall bilang kapalit ng nagsarang SM Cubao branch na katabi lamang nito. Sinundan pa ito ng mga panggigipit sa mga aktibong myembro at leader ng BISIG at pagbalewala sa ating demand sa management ng isang CBA sapagkat sa panahong iyon ay di pa naman final ang cancellation ng ating independent registration, bagay na nilinaw ng office of the secretary ng DOLE nang ibasura ang Motion for Reconsideration o MR ng Buklod at katigan ang BISIG bilang sole and exclusive bargaining agent o SEBA.

Nanatiling bingi ang management sa ating mga hinaing ng mga panahon na iyon. Hudyat upang pukawin natin sila at maghain tayo ng Notice of Strike o NOS. Sadyang binabalewala pa rin ang ating tinig sa mga concillation sa NCMB kung kaya inilunsad ng BISIG ang isang picket protest sa harapan ng planta noong Mayo 20 1t 27, 2008. Ito ay dinaluhan ng mga manggagawang naka-day-off, mga empleyadong tapos na ang duty at mga panggabi. Dito nakialam na ang Secretary of Labor. Naglabas ng Assumption of Jurisdiction o AJ. Hudyat para sa BISIG na itigil ang napipintong welga at bilang pagsunod na rin sa proseso ng batas.

Mayo 27, 2009 nang ideklara ng NLRC na welga raw ang inilunsad ng mga manggagawa sa Goldilocks noong Mayo 20 at 27, 2008 at ilegal daw ito. Kasama rin ang iba pang kaso katulad ng pag-transfer sa limang empleyado ng nagsarang SM Cubao branch, illegal suspension. Puro pabor sa management ang laman ng desisyong iyon, at Enero 2010, muling kinatigan ng NLRC ang naunang desisyon maliban sa pagkilala sa Buklod bilang bargaining agent kung saan binawi ng NLRC 6th Division (Comm. Nieves De castro, Comm. Benedicto Palacol at Isabel Ortiguera) naunang pagkilala sa Buklod bilang bargaining agent. Tayong manggagawa sa Goldilocks ang makapagsasabi na walang naganap na welga noong Mayo 20 at 28, 2008. Iyon ay piket protest lamang.

Pebrero 8, 2010, natanggap ng management ang nasabing desisyon at ura-uradang pinatawag at pinauwi ang mga manggagawang nakapaloob sa NLRC decision at pinapapunta sa Pacific Center upang pirmahan ang mga dokumento at tanggapin na ang pera bilang pagtangap sa desisyon ng NLRC. Ito ay isang tuwirang paglabag sa proseso ng NLRC rules. Una: kailangan matanggap muna ng kabilang panig ang desisyon; pangalawa: hintayin dapat ng management ang Entry of Judgment; pangatlo: pagtanggap ng Entry of Judgment, kailangan silang mag-file ng Petition for Writ of Execution at hintayin ang order at ang huli: mayroon pang 60 days period ang Bisig para iakyat ang apela sa Court of Appeals. Ang lahat ng ito ay hindi nirespeto ng management kaya't noong Pebrero 9, 2010, naghain na tayo ng NOS.

Sa mga conciliation ay nanatiling matigas ang management sa usapin ng pagtatanggal. Lalong naging kumplikado ang sitwasyon ng maging usap-usapan na sa Goldilocks na may 2nd batch pang tatanggalin na halos triple ang bilang kaysa nauna. Mismong Buklod pa ang namamalita nito na lubos na ikinaalarma ng organisasyon. Ito ang nagbigay ng matibay na dahilan sa Bisig na ilunsad na ang mga welga upang mahadlangan at bago pa magkatotoo ang pinapakalat ng Buklod na tanggalan.

Marso 11, 2010 bago mag-alas-tres ng madaling araw ay payapang nailunsad ng BISIG ang welga. May mga pagtatangka ang pulis-Mandaluyong na buwagin ang picket line ngunit nabigo ang mga ito nang harangin ng DOLE na siyang may exclusive jurisdiction sa welga. Tama at legal ang welgang inilunsad kaya't hindi ito nabuwag. Ang hindi natin maubos maisip kung anong tason o lohika meron ang Buklod at nagpasya itong lusubin ang picket line at pagbabatuhin ang mga nagwewelga. Anong pakinabang nila kung mabuwag o matalo ang mga welgista? May mawawala ba sa kanila kapag nagtagumpay ang welga? Malinaw na walang rason para gawin nila ito. Huwag nilang sabihin na papasok sila sa trabaho ng araw na iyon, na batid nilang wala pang pasok. Mayroon bang papasok sa Goldilocks na ang laman ng bag ay bato at may mga nakasupot na buhangin sa bulsa?

Mapalad tayo sapagkat nasa atin ang gabay ng Panginoon. Marahil dahil nasa tama ang ating ipinaglalaban at sa mga panalangin natin at dasal ng mga pari na nag-alay ng misa sa picket line. Akalain ba nating may Buklod officer na nabuksan ang isip at nagmalasakit sa mga nagwewelga na siyang nagbigay sa atin ng mga detalye ng planong paglusob ng mga alipores ni Junny. Sa una, mahirap paniwalaan at pagkatiwalaan dahil siya ay opisyal ng Buklod, pero nang ilantad niya sa atin ang pangalan niya at tumawag pa para sa pagkakakilanlan, doon unti-unting nabuo ang tiwala natin sa kanya. Binigay niya ang bawat detalye ng plano nila sa plan A at plan B, kasama na ang panel na sasakyan ng mga tao, ang sasakyan ng motorpool na magbabakod ng gate, oras ng pag-atake at iba pang detalye. Sa iyo, di man namin mailantad ang pangalan mo dito para sa iyong kaligtasan at seguridad. Batid naming alam mong ikaw ito. Saludo kami sa iyong katapangan at asahan mong nasa likod mo kami sa oras na iyong kailanganin ang BISIG.

Kahandaan, determinasyon at pagkakaisa ang naging sandata natin kaya nagtagumpay ang ating welga. Marso 26, 2010 nang pirmahan ng BISIG at Management ang agreement bilang hudyat ng pagtatapos ng welga at pagkilala ng Management sa demands ng BISIG sa gabay ng DOLE-NCMB.

Ikinararangal at kinikilala ang tapang na ipinamalas ng mga myembro nang ipinagtanggol ang picket line sa tangkang buwagin ito at lusubin ng Buklod. Ipinagmamalaki rin ng BISIG ang pangulo nito na si Joel Lachica sa ipinakitang katapatan na ipaglaban ang kapakanan ng mga manggagawa na tumindig sa unahan ng labanan bilang pinuno na handang suungin ang panganib sa kamay ng kaaway ng walang pag-aatubili at hindi piniling iwanan sa gitna ng bakbakan ang mga tagasuporta at magpalamig sa Puregold.

Mga myembro na handang dumamay at ipagtanggol ang karapatan at kapakanan ng kapwa manggagawa. Lider na matatag, may prinsipyo at mapagkakatiwalaan. Unyon na tunay at palaban. Ito ang dapat nating suportahan. Ang takot ay nasa isip lamang. Tayo na't sama-samang lumaban upang ang takot ay wakasan. Nasa ating kamay ang pagkakataong baguhin ang ating kapalaran at kinabukasan sa isang malinis na halalan. BISIG lang ang ating maaasahan. Tulong-tulong nating ipanalo ang laban sa darating na Certification Election. Mabuhay tayong lahat!

Bukluran ng Independyenteng Samahan
na Itinatag sa Goldilocks (BISIG)

Bukas na Liham ng Pasasalamat

BUKAS NA LIHAM PASASALAMAT

Pagpupugay sa Tagumpay ng Welga!

Sa kapwa ko mga manggagawa, kasama, kaibigan at mga kumpare’t kumare, ako ay lubos na nagpapasalamat sa inyong mga naging papel at napagtagumpayan natin ang welga. Hindi lang ang mga personal na nakibahagi sa picketline bagkus ang lahat na mga manggagawa sa Goldilocks ay may kanya-kanyang papel na ginampanan na naging ambag ng bawat isa sa nagdaang welga. Alam naming mga nasa picketline na kahit wala kayo doon ay nasa likod namin kayo at sa puso ninyo’t isipan ay naroroon ang inyong paghahangad at dalangin na manalo ang welga. Ito ang nagbigay sa amin ng lakas at inspirasyon upang lumaban at itaas ang ating bandila ng pakikibaka sa ngalan ng ating pagkakaisa na mabago ang kalagayan nating mga manggagawa dito sa Goldilocks.

May mga pagsubok na minsan ay halos hindi na natin makayanan. Mga pangyayaring tumatatak sa ating isipan na kung bakit nangyayari ang mga ito. Sa maniwala kayo’t sa hindi, sa personal kong karanasan, ito ang nagbigay sa akin ng lakas upang lumaban sa hamon ng buhay at ito’y ating napagtagumpayan!

Sa panahon ng welga, maraming pagsubok ang aming sinuong. Nandyan ang halos araw-araw na pagtatangka ng mga pulis Mandaluyong na buwagin ang picket-line at mga panganib na hindi inalintana ng lahat. Ngunit ang lubos na napakasakit para sa amin ay ang panahon na mismong mga BUKLOD ang lumusob at paulanan ng bato ang ating mapayapang picketline. Napakahirap tanggapin na kapwa manggagawa ay magkakasakitan samantalang iisa lang at pare-pareho ang hinahangad na mapabuti ang kalagayan at proteksyon sa trabaho na siyang pangunahing diwa ng inilunsad na welga. Labag man sa aming kalooban, ay wala na kaming mapagpipilian, obligado na kaming ipagtanggol ang welga at ang ating karapatan.

Hindi ko ginustong makasakit at di ko rin gustong masaktan ng mga oras na iyon pero ang higit sa lahat na hindi ko magagawa ay iwanan sa gitna ng kaguluhan ang aking mga kasamahan. Bilang lider ng unyon, itinanim ko na sa aking isip na dapat ako ang nasa unahan ng bawat laban. Obligasyon ko na protektahan at ipaglaban ang bawat miyembro ng organisasyon, ito man ay sa welga at pagtatanggol sa mga kasamahan na ginigipit at hina-harass sa trabaho.

Iba't ibang balita ang nakakarating sa inyo tungkol sa nagdaang welga. Karaniwan pa ngang negatibo at kabaligtaran ng totoong pangyayari ang bitbit na balita ng BUKLOD. May mga text pa ngang ipinapakalat na kunwari ay BISIG supporter ang gumawa at nagsisisi sa pagsuporta sa BISIG. Nakakataba ng puso at ako'y labis na nagagalak sa ginagawang ito ng ating kalaban. Ito ay isang malinaw na pag-amin ng BUKLOD at pagpapakita na sila ay napapag-iwanan na sa kangkungan. Tumutuntong na sa desperadong pamamaraan na tiyak sa lubluban ng kalabaw dadamputin dahil mahirap paniwalaan. Asahan na rin natin na marami pang black propaganda ang ibabato sa akin at sa BISIG, mga kuwentong gawa-gawa at paninira sa organisasyon na sa huli ang kalalabasan ay nais lamang na ibenta ng BUKLOD ang sarili mula sa putik na kanilang kinalulubluban.

Taas noo kong ipinagmamalaki ang naipanalo nating welga! Ang Memorandum of Agreement (MOA) na nilagdaan sa pagitan ng BISIG-AGLO at MANAGEMENT sa gabay ng DOLE-NCMB ang siyang patotoo na napagtagumpayan ng mga manggagawa ang welga. Walang MOA na magaganap at patung-patong na kaso ang kakaharapin ng mga opisyales kung talunan ang welga. Sa katunayan, may bitbit pa nga tayong bagahe ng panalo nang kilalanin at ibigay ng management ang ating mga kahilingan na inyong matutunghayan sa nasabing MOA.

Alam ko at alam rin ninyong lahat na hindi pa ito ang dulo ng ating laban. Huwag nating hayaan na masayang ang naumpisahang panalo sa welga. Sa darating na Certification Election ay samahan ninyo akong muli at magtulong-tulong tayo na maipanalo ang laban upang lubos nating mapagwagian ito. Suportahan ang tunay na unyon, BISIG-AGLO para sa PAGBABAGO!

JOEL O. LACHICA
Pangulo
BISIG-AGLO

BMP Official Statement on the Goldilocks Strike

BMP Official Statement on the Goldilocks Strike
March 27, 2010

Yesterday, the 16th day of Goldilocks Strike was a victorious day for the Goldilocks Workers. It was truly a remarkable day for the workers who made a milestone in pursuing their basic right to strike and successfully forged an agreement with the management to break the impasse.

Through the conciliatory efforts of the Department of Labor and Employment, both parties agreed to end the strike on the basis of the following:

1. Effective March 27, the day after the lifting of the strike, status quo for all striking workers should be enforced without any sanctions.

2. For the 94 illegally dismissed striking workers, they are all payroll reinstated upon the lifting of the strike and will take effect until the Court of Appeals has finally ruled on the motion for reconsideration filed by Buklod on the issue of Certification Election and another 60 days time frame for the execution of the said ruling. In the event that the time frame for the implementation of the Certification Election will not be realized, a negotiation for the extension of the time frame would then be decided by both parties. Payroll reinstatement covers not only their salary but also all the benefits due them as regular employee.
3. For the purpose of pursuing a speedy implementation of Certification Election, a special body would be created composed of selective officials from the BLR-DOLE.
4. No retaliatory actions by both parties will be observed.

The Goldilocks strike added a new dimension to the present day struggle of the Filipino workers. For nearly a decade now, the Filipino workers in general were totally devastated as to the ill effects of the onslaught of globalization. Despite the threats and hardships, the Goldilocks workers stood their ground and their courage taught us a lesson that nothing is impossible for as long as you exercise your right on just grounds.

The Goldilocks workers proved that they can withstand the long and tedious strike, fought and frustrate the attempts of the management to break their ranks and lastly, their grim determination to win and openness to all forms of struggle.

We from the BMP (Bukluran ng Manggagawang Pilipino) salute the bravery of the Goldilocks workers. We believe that what they have done will usher a new complexion for the struggle of the Filipino workers.

We also commend the undying support from all our friends, allies and network in the labor front as well as those from various sectors, groups and institutions that one way or another helped us achieve total victory for the Goldilocks workers.

Ang naganap na panggugulo sa picket line ng GOLDILOCKS

Ang naganap na panggugulo

sa picket line ng GOLDILOCKS

Noong Marso 19, ganap na ika 10:30 ng umaga, nilusob ng mga gwadya, lider ng talunang unyon at drivers ang mapayapang piket ng mga manggagawang kaanib ng unyon ng BISIG. Lumusob sila na may mga tali sa kanilang ulo at braso, nasa unahan nila ang dalawang closed van na puno ng iskerol at sa likuran ng unang van ay mga panatiko ni Junny Gachitorena (presidente ng natalong unyon) na may hawak na mga bato.

Nang harangin ng mga nagpipiket na manggagawa ang van sa harapan ng gate ng kompanya, isa sa panatikong lider ng Buklod ang kaagad dumukot ng buhangin sa kanyang bulsa at buong lakas na isinaboy sa mukha ng mga humarang na manggagawa. Ito ang naging hudyat ng sunod sunod na pambabato ng mga panatikong nakatago sa likuran ng van.

Walong manggagawa mula sa hanay ng nagpipiket ang kaagad tinamaan at nasugatan. Naobligang gumanti ang mga nagpipiket upang hadlangan ang tuloy tuloy na paglusob ng mga bulag na taga sunod ng management at ni Junny Gachetorena.

Kinukundina namin ang ginawang paglusob dahil;

Una, ligal ang nagaganap na welga! Tumalima ang unyong BISIG sa mga prosesong kinakailangan batay sa kahingian ng isinampang kaso. Patunay rito ang di paglalabas ng DOLE ng kautusang buwagin ang piketline.

Ikalawa, may nagaganap na conciliation sa DOLE sa pagitan ng unyon ng BISIG at mga abogado ng Management. Isang mapayapang solusyong pinagsisikapang panaigin ng mga nag-uusap kasama ang DOLE.

Ikatlo, kinukundina namin ang isang bungkos na mga panatikong nagsabog ng buhangin at nagpaulan ng bato sa piketline. Gayong alam na alam nila na maraming bata at asawa ng mga manggagawa ang nasa piketline.

Asawa at anak na dun na natutulog, kumakain dahil mahigit isang buwan na silang inalisan ng kabuhayan mula nang sila ay iligal na tinanggal sa trabaho noong Pebrero 8.

Ikaapat, kinukundina rin namin ang kapulisan ng Mandaluyong na hinayaang lumusob ang mga panatiko at makapanakit, gayong nakapwesto naman sila sa iisang lugar kasama ng mga panatiko bago lumusob. Salitang “hinayaan” na lang ang aming ginamit at hindi ang nabalitaan naming sila mismo ang nag-utos sa mga panatiko.

Ikalima, kinukundina rin namin si Junny Gachitorena na matapos isubo ang isang bungkos niyang mga panatiko ay kumaripas ng takbo, uminom ng shake at nagpalamig sa loob ng Pure Gold habang nakikipagbuno ang kanyang mga tauhan.

Itigil ang kultura ng pananakit at pagpatay sa mga manggagawa ng Goldilocks!

Ibalik sa trabaho ang mga manggagawang iligal na tinanggal!

Ihinto ang planong pagtatangal sa iba pang mga regular na manggagawa!

Wakasan na ang pag-eempleyo ng kontraktwal na manggagawa!

BISIG-AGLO-BMP

10 Things you should know about the Goldilocks Labor Dispute

http://dleftclick.wordpress.com/2010/03/23/10-things-you-should-know-about-the-goldilocks-labor-dispute/

10 Things you should know about the Goldilocks Labor Dispute
from Primo's blog dleftclick.wordpress.com

1. Not a single workers’ strike recently happened in Goldilocks. Though the legitimate and genuine labor union (BISIG) filed three separate Notices of Strike (Dated 04/24/2008; 07/01/2008; and 10/13/2008), all of these were AJ’d (Assumption of Jurisdiction) by the Labor Secretary effectively averting the supposed strikes to happen.

2. The activity happening in front of the Goldilocks Plant in Mandaluyong is a picket-protest against the dismissal of 129 officers and members of BISIG.

3. Contrary to the information that the management and their paid-hacks spread, BISIG won overwhelmingly against BUKLOD (the pro-management union). Here is the breakdown of votes: BISIG – 764; BUKLOD – 653; Spoiled ballots – 38; Challenged votes – 202)

4. BISIG was already certified as the sole and exclusive bargaining agent of Goldilocks employees since March 17, 2008. This led to BISIG’s letter of intent to commence CBA (Collective Bargaining Agreement) negotiations on April 16, 2008 but the management refused to heed their call.

5. DOLE reaffirmed BISIG’s position as the legitimate labor union through a Resolution released by Undersecretary Romeo Lagman on July 8, 2008. The Goldilocks management still refused to start the CBA process even after the release of this document.

6. The management only agreed to commence CBA negotiations when the NLRC, through a decision written by Commissioner Nieves Vivar-de Castro, reversed all resolutions that legitimize BISIG. This led to having BUKLOD, the losing pro-management union, as the sole bargaining representative of Goldilocks workers.

7. A far cry from the standard procedure of sending official government documents by registered mail, the said decision was hand carried by an NLRC employee a day after its promulgation.

8. There is no truth to the rumor being peddled by the Goldilocks management and their paid-hacks that BISIG and their supporters started the violence that erupted last Friday (March 19). How come that all of the 8 casualties (Danilo Gicana, Wilson Dy, Carlito Geda, Roberto Carrabacan, Ronald Macalalad, Cillo Crucillo, Canuto Barba and Adolfo Manaog) are from the BISIG side? The public must be informed that Goldilocks has a deadly track record in the field of industrial relations. In 1979, three workers were killed and six were wounded when the police tried to disperse a legitimate strike.

9. Amidst the misinformation being done by the management and their paid-hacks, the cause of Goldilocks workers are gradually gaining support from different labor groups, community organizations, professionals, political leaders, students and even bloggers.

10. You can support the cause of Goldilocks workers by boycotting Goldilocks products until the resolution of this dispute. You can also forward/re-post this article on your own blog/website or social networking profiles. Better yet, visit their picket line (498 Shaw Boulevard, Mandaluyong City) to encourage them and extend moral support.

Horacio "Ducky" Paredes, ang Dyornalistang Binaligtad ang Totoo

Horacio "Ducky" Paredes,
ang Dyornalistang Binaligtad ang Totoo

UMAAPAW sa kasinungalingan ang upak ni Horacio Paredes sa mga welgista sa Goldilocks sa kanyang sulatin sa Malaya, Abante at blog http://www.duckyparedes.com/blogs/2010/03/18/magulo-ang-mga-maka-kaliwa/ noong Marso 18, 2010.

Unang kasinungalingan ni Paredes: Sa halalan, nanalo ang BUKLOD, at siyempre ang sigaw ng BISIG eh dinaya sila.

Ang totoo: Ginoong Paredes, dinaig mo pa si Garci! Ang opisyal na iskor ayon sa rekord ng BLR-DOLE na nagconduct ng eleksyon na ginanap noong Agosto 6, 2007 ay: Bisig—764 votes, Buklod—653 votes. Lamang ang Bisig ng 111 votes. Dahil sa iskor na ito, idineklara ng opisina ng Sekretaryo ng DOLE na SEBA o sole and exclusive bargaining agent ang Bisig noong Marso 17, 2008, matapos dinggin ang napakaraming election protests ng Buklod.

Ikalawang kasinungalingan ni Paredes: Nilapitan nila ang management ng Goldilocks, at pinilit silang ideklara na panalo ang BISIG.

Ang totoo: Kailanman, di naghabol ang Bisig sa resulta ng eleksyon. Ang Buklod ang naghabol noon. Tingnan ang mga rekord sa DOLE. Tapos ng usapin ito noon pang Marso 17, 2008!

Nang ideklara ng DOLE na panalo sa halalan at bilang certified SEBA, agad na naghain ang Bisig ng proposal para sa kapakanan ng lahat ng rank and file employees pero ito ay inisnab ng manedsment hanggang ngayon. Matigas ang ulo ng manedsment, ayaw sundin ang batas. Ang gusto ng manedsment na makaharap sa negosasyon ay ang talunang tuta nitong Buklod na isinuka na ng mayorya ng manggagawa sa Goldilocks.

Ikatlong kasinungalingan ni Paredes: Ilang mga dating empleyado (na nahaluan na din ng mas nakararaming pulahan at bayaran na walang kinalaman sa Goldilocks) ay nakaharang sa harap, at walang hinahayaang pumasok o lumabas.

Ang totoo: Mayorya ng nasa piket ay empleyado ng Goldilocks—tinanggal at di tinanggal. Yung ibang di empleyado ng Goldilocks ay kapwa manggagawa sa ibang pabrika at kalapit na komunidad. Sila ay kusang sumusuporta sa laban ng manggagawa sa Goldilocks. Solidarity ang tawag dito. Ginoong Paredes, iharap mo sa midya ang nakausap mong bayaran at pulahan na nagpipiket upang mapatunayan ang sinasabi mo at hindi lang pure and simple propaganda.

Ikaapat na kasinungalingan ni Paredes: Kinadena nila ng pilit ang mga gate.

Ang totoo: Ang manedsment mismo ang nagpawelding sa mga gate. May video footage na magpapatunay niyan. Puntahan nyo ang mga nagpipiket at ipakikita sa inyo ang video na tao ng manedment ang nagwelding sa gates.

Ikalimang kasinungalingan ni Paredes: At ano naman ang hinanakit nitong mga nag-ra-rally? Sobra ba silang na-dehado ng kumpanya kaya dinala na lang nila sa kalsada ang kanilang mga sama ng loob? Ang katotohanan, ang puno’t dulo nito ay katigasan ng ulo at makitid na utak.

Ang totoo: Ang mitsa ng welga ay ang pagtanggal sa trabaho sa 127 lider at aktibong kasapi ng unyong Bisig na matiyagang kumikilos ayon sa kanilang mga karapatang itinatadhana ng Labor Code at Konstitusyon ng Pilipinas. Inalisan ng hanapbuhay, inalisan ng makakain ang 127 pamilya. At pag di pumalag ang Bisig ay marami pang tatanggalin sa trabaho dahil sa plano ng manedsment na palitan ang mga regular ng kontraktwal—mas mababa ang sweldo at benepisyo at di kikibo anumang katarantaduhan ang gawin ng manedsment. Iyan ang labag sa batas! Ikaw kaya Ginoong Paredes ang alisan ng hanapbuhay at agawan ng pagkaing isusubo na lang ng iyong mga anak?

At ang ugat ng usaping ito ay ang pag-ayaw ng manedsment ng Goldilocks na harapin sa negotiating table para makabuo ng collective baragining agreement ang panalong unyong Bisig na duly certified sole and exclusive bargaining agent of all rank and file employees of Goldilocks matapos ang eleksyon higit 2 taon na ang nakararaan at ang gusto ng manedsment na makaharap ay ang talunang Buklod na isang company union o tuta nito. Kaya para mawasak ang nanalong alternatibong unyong Bisig, sari-saring pakana ang ginawa ng manedsment gaya ng gawa-gawang kaso sa pangulo, at sa iba pang lider at aktibong miembro na siyang dinidinig sa NLRC. Dito nagkabuhul-buhol sa usaping legal ang Glodilocks management at ang NLRC.

Di naman magwewelga ang mga manggagawa kung ang manedsment ay di nagtanggal at sineryoso nito ang pakikipag-usap sa mga unyunistang nanalo sa halalan. Patunay dito ang ilang beses na pag-atras ng Bisig sa Notice of Strike na ipinayl nito sa DOLE sa tuwing mangangako ang manedsment na makikipag-usap na.

Ikaanim na kasinungalingan ni Paredes: May mga tao kasi na kapag di nakuha ang kanilang gusto, dinadaan sa gulo.

Ang totoo: Ang magwelga ay di panggugulo. Ito ay legal na paraan ng sinumang manggagawa para makamtan ang pagpapahusay ng kalagayan sa loob ng pabrika gaya ng (1) pagtataas ng sweldo at benepisyo, (2) makataong kalagayan sa pagtatrabaho, (3) security of tenure o kaseguruhan na may trabaho, (4) matupad ang karapatan na magkaron ng sariling organisasyon na di nadidiktahan ninuman laluna ng manedsment, (5) maipatupad ang karapatan para sa sama-samang pakikipagtawaran o makapagbuo ng collective bargaining agreement. Lahat ng iyan ay karapatan ng sinumang manggagawa na nakasaad sa Labor Code of the Philippines at sa Philippine Constitution.

At ang MAGWELGA ay karapatan din na nasa Konstitusyon (see article on Social Justice, Philippine Constitution) at Labor Code.

Ang magulo ay ang management. Ayaw nitong harapin ang duly certified exclusive bargaining agent of all rank and file employees of Goldilocks. At gumagawa ng lahat ng paraan para mawasak ang Bisig gaya ng pagpaparesign sa mga aktibo, iyong di masilaw sa pera ay ginawan ng sari-saring kaso na inireklamo nito sa NLRC.

Ang magulo ay ang NLRC. Na nag-order na makipag-CBA ang manedsment sa Buklod kahit walang kasong isinampa rito dahil nga di nito jurisdiction ang gayong kaso kundi ang DOLE. Magulo dahil dapat Bisig ang makipag-CBA hindi ang Buklod na talunan sa halalan. Magulo dahil ang Bisig ang nagsumbong laban sa manedsment at ang ibinabang order ng NLRC ay parusang pagtanggal sa mga nagsumbong! Saan ka nakakita na ang pinarusahan ay ang nagsumbong?

Ang magulo ay ang Buklod. Matapos matalo sa halalan ay gusto nitong siya pa rin ang tatayong unyon sa Goldilocks kahit isinuka na ito ng mayorya as per record ng BLR-DOLE.

Ang magulo ay IKAW Ginoong Paredes. Magulo ka dahil puro di totoo ang mga isinulat mo! Ano ba ang interes mo sa Goldilocks? Hindi namin hinihingi na mahiya ka sa aming mga manggagawa dahil kabisado naming ikaw ay maka-kapitalista. Mahiya ka naman sa kapwa mo dyornalista na objective magsulat at sa mga naging guro mo sa paaralan at mga magulang na humubog sa iyo. Maipagmamalaki ka ba nila?

Ikapitong kasinungalingan ni Paredes: Upang malaman kung sino ang tinatawag na “sole representative union.” Dinadaan sa botohan yan, at kitang-kita naman na walang dapat panigan ang kompanya. Ganoong-ganoon ang nangyari sa Goldilocks.

Ang totoo: Pinanigan ng Goldilocks management at NLRC ang natalong BUKLOD. Eto ang patunay: Kahit hindi case at bar, at wala sa jurisdiction nito, inutusan ng NLRC ang management na makipag-CBA sa natalong Buklod. At hinarap naman ng Goldilocks management ang Buklod sa isang negosasyon.

First time ito sa kasaysayan ng kilusang paggawa na utusan ng NLRC ang management na makipag-CBA sa natalong unyon at hindi sa DOLE certified sole and exclusive bargaining agent. Ang dapat—ang legal at tradisyon ay (1) DOLE hindi NLRC ang magsasabi kung sino ang sole and exclusive bargaining agent, (2) ang deklarado at certified sole and exclusive bargaining agent ang dapat harapin ng manedsment sa negosasyon, (3) ang nakasampang kaso lang dapat ang inaksyunan ng NLRC—ang notice of stike na naglalaman ng mga sumbong ng Bisig laban sa harassment at diskriminasyon ng manedsment.

Ginoong Paredes, di “sole representative union” ang tawag dun kundi sole and exclusive bargaining agent o SEBA.

Ikawalong kasinungalingan ni Paredes: Nauwi ang kaso sa NLRC (National Labor Relations Commission) ng DOLE. ….Pagkatapos ng matinding pagsuri at imbestigasyon, lumabas ang desisyon ng NLRC noong nakaraang Mayo 2009. Idineklara nito na walang kaduda-duda na panalo talaga ang BUKLOD. Siyempre, hindi na naman pumayag ang BISIG. Mismong NLRC na ang nagsabi, pero dayaan pa din daw. Talaga nga naman!

Ang totoo: Ang kaso ng eleksyon ay hindi sa NLRC dinidinig. Walang ganitong kaso sa NLRC. Sapagkat walang jurisdiction sa kasong eleksyon o intra-union o inter-union conflicts ang NLRC. Ito ay jurisdiction ng BLR-DOLE. At ito ay matagal ng tapos na kaso at ang BISIG nga ang sinertipikahan ng DOLE na sole and exclusive bargaining agent ng lahat ng manggagawang rank and file sa Goldilocks.

Ang kasong nasa NLRC ay ang illegal dismissal kay Joel Lachica, Pangulo ng Bisig na matagal ng nakabinbin sa NLRC at iba pang kaso ng harassment sa mga manggagawa. Hindi isyu sa NLRC kung sino ang panalo sa eleksyon!

Ikasiyam na kasinungalingan ni Paredes: …at wala ni isang kilos ang Bisig para sundan ang tamang daan.

Ang totoo: May dalawang (2) legal na opsyon ang manggagawa matapos ang order ng NLRC. Mag-apela sa Court of Appeals o magwelga. Parehong karapatan nila yan. Parehong garantisado ng mga batas—Labor Code at Konstitusyon ng Pilipinas. Di pwedeng sabay. Kailangang pumili ng isa lang.

Welga ang pinili ng mga manggagawa. Iyon ang napili nilang tamang daan ayon sa pagtaya nila sa kalagayan. Sino ka ba Ginoong Paredes para sabihin sa kanila ang “tamang daan”? Di mo nga nararamdaman ang kanilang pagpapakasakit. Di mo nga nakikikita ang kanilang paghihirap sa kamay ng manedsment. Di mo nga pinakikinggan ang kanilang panig. Ignorante ka pa sa batas paggawa!

Ikasampung kasinungalingan ni Paredes. Ayon kay Dina Portugez, na isang cake icer: “panalo naman talaga ang BUKLOD, ewan ko ba bakit hindi ito matanggap ng BISIG. Bumoto naman kami ng maayos, nabilang naman ng tama. Diba dapat kung ano ang napili ng nakararami, yun ang masusunod? Parang hindi alam ng mga BISIG kung ano ang ibig sabihin ng demokrasya.”

Ang totoo: Dalawa na silang sinungaling. Si Dina Portugez ay board member ng natalong Buklod. Isa siya sa benepisyaryo ng maiitim na pakana ng manedsment ng Goldilocks, NLRC, Buklod at ilang tao sa masmidya na kagaya ni Paredes. Sapagkat ang mga tuta na nagkukunwaring lider-manggagawa ay laging may bonus mula sa amo. Ganun na lang ang paninira ni Dina Portugez at ng manedsment sa Bisig dahil hanggang ngayon ay di pa nila matanggap na tinalo sila ng Bisig noong eleksyon 2007 kahit kakampi na nila ang manedsment sa paninira at pananakot sa mga manggagawa para huwag iboto ang Bisig noon.

Pero dahil gusto na ng manggagawa ng Goldilocks ng pagbabago kaya tinambakan ng 111 boto ng Bisig ang Buklod.

Iyan ang sampung kasinungalingan ni Horacio ‘Ducky’ Paredes na labag sa sampung utos.

Pawang kabaligtaran ng katotohanan at pambabaluktot sa katotoohanan ang sinulat ni Horacio Paredes. Nakatuntong sa pawang kasinungalingan ang kanyang mga argumento laban sa mga welgista.

Sa journalism, ang kauna-unahang rule na dapat sundin ay objectivity. Ibig sabihin, katotohanan lang. At ang facts na nakuha ay bini-verify muna ng ilang beses bago gamitin sa isang sulatin.

Saan kaya nakuha ni Paredes ang mga datos niya? Nagresearch ba siya sa mga records ng BLR-DOLE na siyang nagconduct ng Certification Election? At sa mga rekord ng NLRC kung anong kaso ang mga hawak nila. Inalam ba niya ang panig ng Bisig? Di lang panig ng manedsment at Buklod. Kung sinunod lang ni Paredes ang basic na itinuturo sa mga paaralan ng journalism, disin sana’y nakita niya sa kanyang pag-iimbistiga ang mga totoong nangyari.

Pero sa tagal na ni Paredes sa dyornalismo, tinubuan na siya ng tahid dito. Alam na alam niya ang basic rule ng objectivity sa journalism. Pero bakit nagawa niyang baliktarin ang totoo?

Sinlaki ng mundo na question mark ang agad na papasok sa ating isipan kung bakit ang kabaligtaran ng katotohanan ang isinulat ni Paredes. Question mark na tutungo sa pag-iisip agad na nabayaran ng MALAKI ng Goldilocks manedsment itong si Paredes para birahin nang todo ang mga welgista sa pamamagitan ng sandamukal na kasinungalingan at panigan ang kumpanya at ang natalong Buklod na company union.

Pero kahit na ang sagadsagaring maka-kapitalista na manunulat ay hindi tahasang isusulat na nanalo ang totoong natalo, hindi babaliktarin ang mga totoong nangyari para makasunod sa gustong propaganda ng among kapitalista. Bakit sinabi ni Paredes at ginawang batayan ng lahat ng kanyang argumento na nanalo ang Buklod kahit totoong talo, at iba pang kabaligtaran ng totoo?

Kahit ang mga kapitalista ng Goldilocks ay di kayang akuing kanila sa harap ng publiko ang mga kasinungalingang isinulat ni Paredes. Integridad at kredebilidad ang nakataya dito. Tunghayan nyo ang sariling propaganda ng kapitalista at makikitang nag-iingat pa ito sa pagbitaw ng mga salita at pinilit na itago ang mga kasinungalingan sa mga salitang nagkukunwaring makatwiran at makatarungan. Di gaya ni Paredes na tahasang kasinungalingan! Kahalintulad niya ay isang bangaw na nang matuntong sa kalabaw ay mas mataas pa sa kalabaw!

Matanda na kasi si Paredes. Siya na lang ang pwedeng tumanggap ng ganitong klaseng subcon mula sa mga kapitalista ng Goldilocks. Tamad ng mag-isip. Iyan ay natural na tunguhin ng katawan at isip ng tao, depende sa lifestyle at body constitution na minana sa genes ng mga ninuno. Dapat ay nagpapahinga na siya sa tumba-tumba. Kulang pa ba ang naipon niyang payola ng mga kapitalista sa kanyang pagsusulat laban sa mga manggagawa hanggang sa kanyang pinal na pamamahinga kaya niya sinulat yun?

Pero di pa mamamahinga si Paredes. Sapagkat siya ay isa sa mga bangaw sa midya. Ang masmidyang naglilingkod sa mga kapitalista at sistemang kapitalismo. Kahit multo ni Paredes ay tiyak na maglilingkod sa mga kapitalista!

Gem de Guzman, Member, Central Committee, Bukluran ng Manggagawang Pilipino (BMP)

3 Puntos hinggil sa Welga ng mga Manggagawa sa Goldilocks

http://www.facebook.com/note.php?note_id=380956343103&id=638139345&ref=nf

Liham sa Patnugot mula sa mga Nagwewelgang Manggagawa ng Goldilocks March 21, 2010

3 Puntos na dapat na maunawaan hinggil sa Welga ng mga Manggagawa sa Goldilocks

Ngayon ang ikalabindalawang araw ng welga ng mga manggagawa sa Goldilocks at ang sigalot sa pagitan ng management at manggagawa ay umabot na paglalabanan sa propaganda at opinyong publiko. Ang mga manggagawa ay walang kakayanang magbayad ng paid ad at mahalagang sagutin ang mga mahahalagang punto na ipinapaniwala ng kompanya kaugnay sa naganap na welga.

Tatlong bagay lang ang simple naming ilinaw at ipabatid;

Una sa usaping ang may pakana ay iilang apektadong manggagawa lamang.

Bago po pumutok ang welga, ito po ay dumaan sa boses ng mayorya. May strike vote na inilunsad at ito po ay pumasa sa pamantayang maraming boto ang nakuha mula sa mga manggagawa. Anumang welga na inilunsad na strikable, hindi isinasagawa hangga't walang pagsang-ayon ang nakararami.

Ikalawa sa legalidad ng ginawang pagtatanggal ng management.

Totoo na may desisyon ang NLRC sa pagtatanggal sa 127. Pero lumabag ang management sa pagpapatupad nito. Ang araw na pagkatanggap ng desisyon ay agarang isinagawa ng management. Noong Pebrero 8 nakuha ang desisyon at agarang di na pinapasok ang mga manggagawa. Sa kalakaran, binibigyan ng sampung araw ang mga manggagawa bago i-execute ang desisyon upang makapag-apela sila. Pero pinagkaitan ng management na mag-apela dahil tinanggal na nila ang mga manggaggawa. Kasinungalingan ang sinasabi nilang binigyan ng ample time ang mga manggagawa. Naisagawa ang pagwewelga dahil sa paglabag mismo ng management sa sinasabi nyang ample time.

Ikatlo, ang usaping marami ang nadadamay na manggagawa.

Nang iputok ang welga, iisa ang hangad ng mga manggagawa, ang mapigilan ang nakaambang contractualization sa Goldilocks. Ang pagtatanggal sa 127 ay hudyat ng pagsasakatuparan ng iskemang ito. Kung kaya't ang laban na ito ay di lamang laban ng 127 kundi laban ng 1,500 regular na manggagawa na anumang oras ay maaring palitan ng kontrakwal ng kompanya.

Ang mga nakawelga ay nagugutom din ang kanilang pamilya at ang sakripisyo nila ay di matatawaran dahil bukod sa wala na silang trabaho ay sinuong nila ang kanilang kalusugan, panganib at ang pagtataya mismo ng kanilang buhay upang depensahan ang piketlayn na kung tutuusin ang panalo nila ay panalo ng buong manggagawa sa Goldilocks.


Para sa kapakanan at interes ng uring manggagawa,

Joel Lachica
Pangulo
Bukluran ng Independyenteng Samahan na Itinatag sa Goldilocks
(BISIG-AGLO-BMP) Contact Number: 09359460790